QOL – Muqdisho, August 6, 2025 – Hay’adda Socdaalka iyo Jinsiyadda Soomaaliya iyo Hay’adda NIRA ayaa maanta ku dhawaaqday go’aammo cusub oo muhiim ah, kuwaas oo saameynaya habka codsiga baasaboorka iyo safarka gudaha dalka. Go’aamadan ayaa lagu micneeyay kuwo lagu xoojinayo hannaanka maamulka socdaalka iyo aqoonsiga muwaadiniinta Soomaaliyeed, iyadoo la waafajinayo istiraatiijiyadda dowladda federaalka ee ku wajahan adeegyo casri ah oo hufan.

Qodobada Muhiimka ah ee la shaaciyay:

📌 Laga bilaabo 1-da Sebtember 2025, muwaadin kasta oo doonaya inuu codsado baasaboorka Soomaaliyeed waa inuu haystaa Kaarka Aqoonsiga Qaranka (NIRA ID). Tallaabadan ayaa lagu xaqiijinayaa sugnaanta iyo kalsoonida xogta shakhsiga codsanaya.

📌 Laga bilaabo 1-da Janaayo 2026, dhammaan dadka ku safraya gudaha dalka — sida duullimaadyada gobollada — waxaa waajib ku noqonaya inay sitaan Kaarka Aqoonsiga Qaranka. Ujeedadu waa in si hufan loo hubiyo xogta iyo aqoonsiga muwaadiniinta ka qeybgalaya safarada gudaha.

📌 Inta ka dhiman waqtiga dhaqan-galka ee go’aamadan, labada hay’adood ee ay arrintani khusayso — Hay’adda Socdaalka iyo Hay’adda Diiwaangelinta Dadweynaha (NIRA) — waxay si wadajir ah uga shaqeyn doonaan isku-dubaridka nidaamyada, tababarka saraakiisha, iyo wacyigelinta bulshada.

Ujeedada Guud:
Tani waa tallaabo cusub oo qeyb ka ah qorshaha dowladda ee lagu dhisayo hay’ado dawladeed oo casri ah, isla markaana la jaanqaadaya baahida iyo horumarka bulshada Soomaaliyeed. Waxaa sidoo kale lagu doonayaa in la helo nidaam isku dhafan oo lagu kalsoonaan karo marka la eego sugnaanta aqoonsiga muwaadiniinta iyo isu socodkooda gudaha iyo dibaddaba.

Hay’adaha Dowladda ayaa ku howlan dhammeystirka hanaan wada-shaqeyn buuxda si loo hirgeliyo nidaamyadan cusub si nabad ah oo waxtar leh.